Wi künnt ok anners – Platt ut Holsteen: Gröönkohl un Platt hört bi uns jümmers tosomen!

Nu wär dat weer sowiet, oh du wunnerbore Gröönkohltied …*g

Un so heff ick mi jüst dach`, ick kunn jo ok mol` n lütt Geschich` ton smustern op Platt vun uns Gröönkohleeten vertelln.

So, as in all de Johren – un uns Tradischon gifft dat siet veele Johren all – sünd wi düsset Johr, vun uns RT 24 mit 41 Mann hoch, an Sünndag, 16. Februor, meddags Klock 12, in Techelsdörper Dörpskroog „An Dörpsdiek“tohoop kommen.

As wi in de Gaststuuv vun den Kroog rin keemen, hett uns de Kröger foorts de grote Deel wiest un wi keemen all an de Dischen to sitten. Wi all hebbt uns bannig över dat Weddersehn freit un möten erstmol `n poor Wöör snacken.

Un denn sä uns Böversten vun RT 24, uns Vörsitter Karl-Heinz „MOIN“ to uns all, un vertellt uns een beeten wat to de nieje Saison, wat wi uns bekieken un wo wi hinförn wüllt. Aver bet nu is noch nich allens nipp un nau fastleggt.

AVER ok, un mit een Oog in de wiedere, op uns all tokamen Tied:

Eemal in`t Johr koomt de Lüüd ut all de 55 RTs in Düütschland mit ehrn schmucken SLs/SLCs tohoop un drapen sik.

Un denn vertell uns Vörsitter, dat uns RT 24 no 23 Johr mol wedder an de Reeg is, in`t överneegst Johr, also in `27, düsset Drapen in Sleswig-Holsteen to organiseern un uttorichten. Un na düsse lange Tied keem he bi all de annern RT-Böversten in Düütschland ni an vörbi, dor to: „Jo, maakt wi“ to segn. Un nu söcht he vundag all tominnst 10 Hölpslüüd, för goode Ideen – kunnen ok mol fidele Grappen ween – dat Plaanen un de Organisatschoon vun düsse grote Upgaav …

Un bi düsse Gelegenheit kregen uns Vörsitter Karl-Heinz mit sien Margit un ok Karen mit eern Jo, een Presentkorf för ehr stännig und düchtig Insetten för unsen Club. Övergeven hebbt dat Karin un Johannes, scheunen Dank seggt wi liekers all tosamen.

Tja, un denn weiht ut de Köök de Luft, de wi all so geern rüken möögt. Uns Kröger bringt den Gröönkohl to Disch – un nu endlich keemen wi mit Eeten in de Gang un langt ok all good to.

Nu is good Benehm meist vergeeten, un Du muss uppassen, wat du di rutangelst ut de grote Schöttel mit Fleesch. Ick dach, ick harr’n goden Fang maakt, denn dree Schieben Swinsback leegen op mien Teller. So schall dat ween un denn wer’t, as grien se mi an, as wull`n se seggen: ,,Ja, nu frett mi man!“

Tja, aver mit Gröönkohleeten, Swinsback, Kookwuss, Kassler Rippen is dat jo son eegen Sook. Also wenn ick mi sülven in Spegel bekieken do, denn hör ick all lang op Diät sett. Aver gifft dat Gröönkohl, un noch mit de marmelgroten, lütten Kantüffeln in de Pann mit veel Zucker kandeert, denn is dat mit de Diät un mien dicken Buuk gau weer vergeeten.

Ja, nee, dor mutt noch wat Zucker op den Gröönkohl baben op … un de Swinsback, de is aver ok schier … un de Kantüffeln … na jo, sünd se beeten kleen, denn gifft dat twee för een …

Dat weer jüst allens na miene Mütz. Un allens wull ok geern dörch mien Halslock glieden und dat rutscht denn ok vun ganz alleen hindal. Un ick eet so flink, dat mi ok keen in mien Eeten rinsabbeln kunn – Nu höögt sick mien Tung` un ook mien Buuk.

Tja, de Annern weern al lang klaar mit’t Eten, aver ick neih mi jüst noch denn dritten Slag to Lief:

Dor heff ick mi ok rein gor nix bi dacht. Nu keem’t mi so vör, as wenn mien` Fru Angelika `n ganze Tied allweer op mienen Teller kieken dä. Ehr wör de Tied wohl all n` beeten lang:

„Nu schust man`n beten tomaken!“ Sä se, „Wi luert blotz noch op die! Un achteran bruks Du weer diene Pillen, de för gegen de Gicht …“

Over segg`n dä ick dorto nix – se bliff jo liekers, un ik hoop ok in all de tokamen Johrn, mien Sööte …

Un denn harrn wi achteran, nich to vergeeten, Döss op een doppelten Köm, de rümt op un verdeelt so fein …

Noch`n Naspies? Froog uns de Krögersch, de Sünndagskoken is grood mit de letzte Hitten fardig backt worn …

Un an’t Enn weern wi all satt, tofreden un stellen fast:

Nu is weer een scheunen Dag in Techelsdörp över’t Gröönkohleeten, Tolustern un Snacken överhengahn. Holsteenschen Gröönkohl mööt ji weeten, is een besonner Aart vun Eeten – un vun mi ut schullt jede Wuch Gröönkohl geben …*g

Un nu freut wi uns in RT 24 all op’t Gröönkohleeten in tokamen Johr.

Oscar Fuchs – Plattdüütsch-Sympathisant ut Preetz